مشاكل من مجتمعنا (2): التصوحيب و عيد الحب

بسم الله و الحمد لله و الصلاة و السلام على سيدنا رسول الله و على آله و صحبه و من والاه .

الحمد لله الذي هدانا لمكارم الأخلاق و الأقوال ، و نهانا عن البدع من الأفعال و جعل الخير كل الخير في إتباع سنة سيد الأنام عليه الصلاة و السلام ..

نواصلوا اليوم إن شاء الله في السلسلة اللي بديناها الجمعة اللي فاتت بالموضوع هاذا مشاكل في مجتمعنا (1): سب الجلالة و الكفر . و نتناولو اليوم ان شاء الله موضوع ولّى ياسر منتشر بيناتنا و خاصة بظاهرة بدينا نحكيو عليها اليوم و هي سبب إنشاء الموضوع في الحقيقة . موضوعنا اليوم إن شاء الله هو التصوحيب و الإحتفال بيوم الحب أو السان فالونتان .

دين الاسلام هو دين السماحة و دين المحبة . دين الأخلاق الحسنة و التعاون . الحب في حياتنا موجود في كل يوم ، في أمر ربنا لينا باش نحبو والدينا و نعملو على اسعادهم ، بإمرو لينا باش نحبو سيدي النبي و نوقروه و نجعلوه القدوة متاعنا و المثل الأعلى . هوني نحب نقول كليمة : إنو حب سيدي النبي يكون بالتذكر متاعو ديما موش يجي نهارت المولد ما نعرفوش حتى أشنوه هو . حب سيدي النبي هو اللي باش يكونلك نهار أخر سبب في الشفاعة و النجاة نهارت اللي لا يفيد لا مال لا فلوس لا جاه . حب سيدي النبي موش كلام شفايف و لكن درس للسيرة و التمثل بيه ... المهم ما نخرجوش برشا عل الموضوع ،
الحب زادا ينجم يكون بين الرجل و المرأة و ربي سبحانو قال " خلق لكم من أنفسكم أزواجا لتسكنوا إليها و جعل بينكم مودة و رحمه" . أنظر التعبير القرأني الرائع عل الحب و المحبة اللي توجد بين الجنسين .

أكثر من هكا ، الحب ربي جعلو من أسباب الرحمة وقت اللي سيدي النبي قال في حديث سبعة يظلهم الله في ظل عرشه يوم لا ظل إلا ظله ... منهم زوز تحابو في الله معناها تحب عبد موش خاطر حاشتك بيه كيف ما برشا ناس توا قاعدة تعمل .. آه هذاكا يصلحلي نهار أخر نحبو و نموت عليه ، هذاكا يعطيني الفلوس و يصرف عليا مالا نحبو .. أما لاخر تي فقير معدوم و إلا عربي جاي من ورا البلايك ...أيه هذا أمة محمد فاش قاعدة تقول !!! و لا حول و لا قوة إلا بالله ... أما كيف أنا نجي صاحبي نحبو علاش؟ موش لأني باش نقل عليه في الإمتحان و إلا خاطر باش يركبني على كرهبتو و لكن لأنو إنسان فاضل .. متربي .... يخاف ربي ... عندو مخ .. يحب لي الخير ! موش يستدعاني باش نشربو الشراب و إلا نبزنسو البنات !!!! هذا ما يحبكش ! و ما يحبلكش الخير ! هذا يحبك تستانس بالمعاصي و الحرام ووقتها تقول " يا ليت بيني و بينك بعد المشرقين فبئس القرين "

قلنا مالا : الحب في ديننا حاجة باهية و هي أساس الكون هذا و الوجود . هو اللي يخليني نعاون المسكين و نمسح على راس اليتيم و نحافظ على بيتي و صغاري .. الحب باهي و لكن أناهو حب ؟ برشا شباب اليوم و إلا شابات .. يقولك صاحبي و إلا صاحبتي .. نحبها ، تحبني .. و كيف تقولو يا ولدي ما يجيش يقولك علاش متخلف هكا ؟ هو الحب حرام ؟
باهي يا أخي و أختي ، إنت كيف تحب واحد و إلا وحدة تحبيلها الخير و إلا الشر ؟ تحبلها النجاح و إلا الفشل ؟
باهي ، وقت اللي إنت تشدلها يديها و تتركن بيها في تركينة بحذا المعهد ، هاذي تلملها في الحسنات و إلا السيئات ؟ تجيبلها في كلام الخير و إلا كلام الشر ؟ تجبد فيها لطريق الخير و إلا طريق الشر ؟
إنت يا ولد و يا طفلة وقت اللي تفصع من ساعة القراية و تهبط للبحر و إلا تمشي لقهوة إنت و صاحبتك ، تنفع فيها في قرايتها ؟ و إلا في قرايتو ؟ تعاون فيه باش يكون شخصية في المستقبل ؟ تعاون فيه باش يعمل حاجة في حياتو ؟ و الأدهى عاد لو كانت الطفلة متحجبة و تلقاها اليد في اليد و إلا قاعدة على فخذو و هو يديه العلم لله ويني ؟ زعمة لها الحد ما تحيرتش الغرائز متاعو ؟؟ إنت يا ولد ترضاها لأختك ؟ لأمك ؟ لبنتك ؟

بالله يا شاب ، يا اللي تحب تعيش حياتك و تعيش شبابك ... نحب نسألك سؤال و إنت أقعد بينك و بين روحك ..
يا هل ترى نيتك وقت اللي تصوحب طفلة إنك تعرس بيها و تعمل معاها دار و ولاد ؟ و إلا "شيخة" كيف ما نقولو توا ؟
هل إنو تقبل إنو رجولتك الكل يكون المقياس متاعها جرد تصوحبة قال شنوه أنا متفتح ؟؟
وقت اللي تقعد إنت و "صاحبتك" وحدكم ، يا هل ترى تحكيو في حاجة منفعة ؟ في حاجة معقولة و إلا في كلام حبني و نحبك ؟

باهي ، و بالله عليك ، تخيل نفسك قاعد إنت و صاحبتك في قعدة من قعداتكم و تتلفت تلقا قدامك راجل قتلو شكونك قالك أنا محمد رسول الله (عليه الصلاة و السلام ) و نحب نقعد معاك ، قلي توا فاش تحكيو و أش عملتو في حياتكم ؟ و علاش أنا نشفعلكم نهار القيامة ؟ وقت اللي الشمش تقرب و الواحد يلهب بيها و العرق تلقاه للكرومة حسب المعاصي .... بالله وقتها أش تقولو ؟ نحبك تفكر فيها بكل شفافية و تجاوب نفسك برجولية .

و الله الواحد مازال يحب يقول برشا كلام أما الله غالب ...إن شاء الله في فرصة قادمة ..
وفقني الله و إياكم لما يحب و يرضى و أعاننا على الإتيان بفعل البر و التقوى ... وصلى الله على سيدنا محمد و على آله و صحبه و سلم تسليما كثيرا ...